Presidenti Donald Trump tha të enjten se Uashingtoni nuk ka më nevojë për një marrëveshje me Iranin, duke pretenduar se SHBA-ja ka një ndikim të konsiderueshëm mbi Teheranin, përfshirë kontrollin e Ngushticës së Hormuzit.
“Nuk kemi nevojë për një marrëveshje me Iranin. Ato kohë kanë kaluar prej kohësh”, shkroi Trump në platformën e tij, Truth Social, shkruajnë mediat e huaja, përcjell Telegrafi.
Ai pretendoi se Uashingtoni ka siguruar asetet financiare iraniane dhe kontrollin e këtij kalimi ujor me rëndësi strategjike.
“Ne i kemi paratë e tyre, qindra miliarda dollarë, dhe e kemi nën kontroll Ngushticën e tyre!”, deklaroi ai.
Ngushtica e Hormuzit, një rrugë jetike për transportin global të energjisë, ka qenë prej kohësh një pikë e nxehtë konflikti midis Iranit dhe SHBA-së; tensionet në këtë zonë kanë një rëndësi të madhe për tregjet ndërkombëtare të naftës dhe sigurinë rajonale.
Në të njëjtin postim, Trump tha se e kishte udhëzuar zëvendëspresidentin JD Vance që t’i kushtonte “vëmendjen e tij të plotë dhe totale” asaj që ai e përshkroi si “korrupsion dhe krim masiv” në shtetet dhe qytetet e drejtuara nga demokratët.
Ai veçoi Minesotën, Kaliforninë dhe Ilinoisin, duke pretenduar se çdo muaj vidhen miliarda dollarë.
“Buxheti ynë mund të BALANCOHEJ shpejt nëse korrigjohet ky aktivitet kriminal në shkallë të gjerë”, shkroi Trump, duke akuzuar udhëheqësit demokratë për korrupsion.
Në një postim pasues, Trump përsëriti akuzat e tij kundër shteteve të drejtuara nga demokratët, duke thënë se demokratët që duan të “rrënjosin korrupsionin” duhet të fillojnë duke hetuar “Shtetet Blu” (shtetet demokrate), të cilat ai i përshkroi si “ndoshta strukturat dhe entitetet qeverisëse më të KORRUPTUARA kudo në Tokë”.
“Shuma të mëdha parash vidhen çdo orë të ditës!”, shkroi ai, pa dhënë detaje apo prova për të mbështetur këto pretendime. /
Telegrafi/
