Kryeministri britanik Andy Burnham kërkon afrim me BE-në: Mund të arrihet një marrëveshje

Kryeministri britanik Andy Burnham ka deklaruar se Britania e Madhe mund të arrijë një marrëveshje të favorshme me Bashkimin Europian, e cila sipas tij do të ishte më pranë asaj që qytetarët mendonin se po votonin në referendumin e Brexit në vitin 2016.

Deklarata vjen në prag të samitit të shumëpritur mes Bashkimit Europian dhe Mbretërisë së Bashkuar, që pritet të zhvillohet javën e ardhshme. Ndërkohë, Burnham ka marrë pjesë në Samitin e Komunitetit Politik Europian në Dublin, ku liderët kanë diskutuar edhe për marrëdhëniet mes Londrës dhe Brukselit.

Në takimin e ardhshëm, të dyja palët synojnë të arrijnë marrëveshje për tregtinë e produkteve ushqimore dhe pijeve, sistemin e tregtimit të emetimeve dhe një skemë të lëvizjes së të rinjve. Megjithatë, çështja e tarifave të studimeve për studentët europianë në universitetet britanike mbetet një nga pengesat kryesore.

“Besoj se mund të arrihet një marrëveshje e mirë, e cila do të ishte fituese për Britaninë dhe Europën. Marrëveshja nuk është përfunduar ende dhe shtatë ditët e ardhshme do të jenë të mbushura me negociata të gjata”, deklaroi Burnham.

Ai theksoi se synimi është rikthimi në marrëdhënie më të afërta bashkëpunimi me Europën, duke argumentuar se Brexit përfundoi me kushte shumë më të ashpra nga sa prisnin qytetarët britanikë në momentin e votimit.

Burnham e cilësoi këtë si një paketë marrëveshjesh, duke theksuar se do të luftojë për përfitimet ekonomike që mund të sjellin marrëveshjet e reja. Sipas tij, marrëveshja për tregtinë e produkteve ushqimore, e cila do të lehtësonte burokracitë e krijuara pas Brexit, mund të rrisë Prodhimin e Brendshëm Bruto të Britanisë me 0.4%.