Boksieri iranian Mohammad Javad Vafaei Sani, i dënuar tri herë me vdekje dhe i burgosur në Iran, është nderuar me çmimin Magnitsky për aktivizmin në mbrojtje të të drejtave të njeriut. Në një mesazh nga burgu Vakilabad, 31-vjeçari tha se nuk do të dorëzohet përballë represionit dhe e kushtoi çmimin atyre që po paguajnë me jetën e tyre për lirinë. Ai pranoi çmimin në emër të të gjithë personave që janë burgosur, torturuar, kërcënuar apo dënuar me vdekje për shkak të aspiratës për një Iran të lirë.
Vafaei Sani, kampion boksi dhe trajner, u shpall fitues gjatë një ceremonie të enjten në Londër. Ai është një prej shtatë sportistëve iranianë që, sipas organizatave për të drejtat e njeriut, rrezikojnë ekzekutimin. Në mesazhin e dërguar nga burgu ai tha: “Regjimi kërkon prej nesh pendim, rrëfime të detyruara para kamerave dhe dorëzim. Por përgjigjja jonë është e qartë: Nuk do të dorëzohemi kurrë dhe nuk do të pranojmë poshtërimin”.
Autoritetet iraniane arrestuan Vafaei Sani në vitin 2020 pas pjesëmarrjes në protestat mbarëkombëtare të vitit 2019, dhe e akuzuan për mbështetje të organizatës opozitare Muxhahedinët e Popullit të Iranit (MEK). Ai u shpall fajtor për akuzën “korrupsion në tokë” dhe u dënua me vdekje për herë të tretë në shtator 2024. Amnesty International ka cilësuar procesin gjyqësor ndaj tij si thellësisht të padrejtë. Më 4 tetor 2025, Gjykata Supreme konfirmoi dënimin me vdekje. Gjatë qëndrimit në burg raportohet se është torturuar dhe mbajtur për periudha të gjata në izolim.
Çështja e tij ka shkaktuar reagime ndërkombëtare, me sportistë, organizata për të drejtat e njeriut dhe ekspertë ligjorë që kanë kërkuar lirimin e menjëhershëm dhe anulimin e dënimit. William Browder, drejtues i Fondacionit Magnitsky Justice dhe kryetar i komitetit të çmimeve, tha se rasti i tij përfaqëson situatën e shumë iranianëve që përballen me ekzekutimin për kundërshtimin e regjimit dhe theksoi se vëmendja ndërkombëtare vështirëson që ai të vritet në heshtje.
Organizata Hengaw raporton se të paktën 710 persona janë ekzekutuar në Iran që nga fillimi i vitit 2026, përfshi 79 të burgosur politikë dhe fetarë. Ajo dokumenton gjithashtu të paktën 106 dënime me vdekje ndaj personave të arrestuar gjatë protestave të janarit, 35 të ekzekutuar, si dhe në burgun Vakilabad pesë persona të ekzekutuar lidhur me protestat dhe 15 të tjerë që përballen me dënimin kapital. Vafaei Sani në mesazh shprehu ëndrrën për një Iran të lirë dhe demokratik, ku qytetarët votojnë pa pengesa, gratë dhe burrat janë të barabartë dhe askush nuk burgoset apo ekzekutohet për bindjet politike.
