Një operacion ndërkombëtar i koordinuar nga Europol ka çuar në arrestimin e 354 personave në 14 vende të botës, të dyshuar për përfshirje në rrjete kriminale që vepronin përmes pjesës së fshehtë të internetit, e njohur si “Dark Web”.

Operacioni, i koduar “TorNado”, u zhvillua gjatë periudhës maj 2025 – tetor 2026 dhe kishte në shënjestër organizatat kriminale që shfrytëzonin platformat e internetit të errët për trafikimin e lëndëve narkotike dhe aktivitete të tjera të paligjshme.

Autoritetet amerikane dhe evropiane publikuan të enjten rezultatet e aksionit, duke bërë të ditur se gjatë kontrolleve dhe ndërhyrjeve policore janë sekuestruar mbi 5.8 ton substanca narkotike, 152 armë zjarri, si dhe para të gatshme dhe kriptovaluta me vlerë të përgjithshme prej rreth 150 milionë eurosh.

Në operacion morën pjesë agjenci ligjzbatuese nga 14 shtete, mes tyre Shtetet e Bashkuara të Amerikës, Britania e Madhe, Gjermania, Franca dhe Australia.

Numri më i lartë i arrestimeve u regjistrua në SHBA, ku përfunduan në pranga 132 persona. Në Britaninë e Madhe u arrestuan 59 të dyshuar, në Hungari 45, në Gjermani 41 dhe në Francë 23.

Vetëm në këto pesë shtete u kryen 300 arrestime, ndërsa 54 personat e tjerë u ndaluan në vendet e tjera pjesëmarrëse në operacion.

Hetimet zbuluan përmasat e mëdha të tregtisë së paligjshme të drogës përmes platformave të fshehta online, ku shitësit dhe blerësit përdornin metoda anonime komunikimi dhe pagesa me kriptovaluta.

Në territorin evropian, autoritetet sekuestruan afro një ton lëndë narkotike, përfshirë kokainë, kanabis, amfetaminë, ketaminë dhe MDMA.

Ndërkohë, në Shtetet e Bashkuara u konfiskuan mbi 4.8 ton drogë. Në kuadër të operacionit u sekuestruan gjithashtu 152 armë zjarri dhe pasuri në para fizike e kriptovaluta, me vlerë totale rreth 150 milionë euro.

Pavarësisht rezultateve të operacionit, Europol paralajmëroi se rrjetet kriminale që veprojnë në “Dark Web” vazhdojnë të ndryshojnë mënyrën e funksionimit për t’iu shmangur ndërhyrjeve të autoriteteve.

Sipas agjencisë evropiane, tregjet e paligjshme në internet kanë treguar aftësi për t’u përshtatur edhe pas goditjeve të njëpasnjëshme nga strukturat ligjzbatuese.

Një nga objektivat kryesore të operacionit ishte ndërprerja e trafikimit të fentanilit, një opioid sintetik jashtëzakonisht i fuqishëm, i lidhur me një numër të madh vdekjesh nga mbidoza, veçanërisht në Shtetet e Bashkuara.

Zëvendësdrejtori i FBI-së, Christopher Raya, deklaroi se operacioni “TorNado” kishte në fokus një prej kërcënimeve më serioze të sigurisë publike, shpërndarjen e fentanilit dhe substancave të tjera të rrezikshme përmes rrjeteve të fshehta të internetit.

Ai theksoi se hetuesit nuk u përqendruan vetëm te përdoruesit apo blerësit individualë, por synuan identifikimin e personave që kontrollonin aktivitetin e paligjshëm dhe organizonin shpërndarjen e drogës.

Sipas zyrtarit të FBI-së, bashkëpunimi ndërkombëtar bëri të mundur identifikimin e shitësve kryesorë dhe goditjen e disa prej hallkave më të rëndësishme të rrjeteve kriminale.

Autoritetet e konsiderojnë operacionin një ndërhyrje të rëndësishme kundër trafikimit të drogës në internet, ndërsa paralajmërojnë se lufta ndaj tregjeve të paligjshme dixhitale mbetet një sfidë e vazhdueshme për agjencitë ligjzbatuese në mbarë botën.