Autoriteti Rrugor njofton se nga sot, në Tiranë nisin punimet në aksin rrugor nga Sheshi Shqiponja te nënkalimi i Limuthit, në kuadër të projektit për plotësimin e infrastrukturës dhe përmirësimin estetik të këtij segmenti. Punimet do të përfshijnë ndërtimin e mbikalimeve për këmbësorët, gjelbërimin e zonës, vendosjen e ndriçimit rrugor dhe rikonstruksionin e shtresave asfaltike deri në pikën e lidhjes me autostradën e re.
Gjatë punimeve do të devijohet përkohësisht njëra prej korsive të qarkullimit, ndërsa lëvizja e automjeteve do të vijojë në korsitë e tjera të disponueshme. ARRSH-ja bën të ditur se janë marrë masat për sinjalistikën e përkohshme dhe sigurinë rrugore.
Njoftimi i plotë:
Autoriteti Rrugor Shqiptar vijon zbatimin e projektit “Plotësimi i punimeve dhe përmirësimi estetik nga Sheshi Shqiponja deri te nënkalimi i Limuthit”, i cili synon plotësimin e elementeve infrastrukturore dhe përmirësimin estetik të këtij aksi rrugor.
Në kuadër të këtij projekti, duke filluar nga data 13.11.2026, do të nisin punimet e parashikuara, të cilat përfshijnë ndërtimin e mbikalimeve për këmbësorët, gjelbërimin e segmentit rrugor, realizimin e sistemit të ndriçimit rrugor, si dhe përmirësimin e shtresave asfaltike në segmentin nga Sheshi Shqiponja deri në pikën e lidhjes me autostradën e re. Gjithashtu, do të realizohen edhe punime të tjera të parashikuara në projekt.
Gjatë zhvillimit të punimeve, në zbatim të planit të menaxhimit të trafikut, do të bëhet devijimi i përkohshëm i njërës prej korsive të qarkullimit, duke garantuar vijimësinë e lëvizjes së mjeteve në korsitë e tjera të disponueshme.
Kontraktori ka marrë masat e nevojshme për organizimin e trafikut, vendosjen e sinjalistikës së përkohshme dhe zbatimin e të gjitha masave të sigurisë rrugore, me qëllim garantimin e sigurisë së përdoruesve të rrugës dhe të personelit që në kantier.
Kërkojmë mirëkuptimin e drejtuesve të mjeteve gjatë zhvillimit të punimeve, si dhe respektimin e sinjalistikës së përkohshme dhe udhëzimeve të punonjësve në terren.
