Një lajm i trishtë ka ardhur nga bota e televizionit amerikan. Aktori dhe humoristi Anthony Clark është ndarë nga jeta në moshën 62-vjeçare, duke lënë pas një karrierë të njohur në komedi dhe ekran. Lajmi për vdekjen e tij u bë publik më 11 nëntor nga aktori Mike O’Malley, me të cilin Clark kishte ndarë eksperiencën në serialin e njohur “Yes, Dear”. Ky i fundit e kujtoi mikun dhe kolegun përmes një mesazhi prekës në rrjetet sociale.
O’Malley tregoi se njohja e tyre datonte që në vitet ’90, shumë përpara se të punonin së bashku. Ai e përshkroi Clarkun si një njeri me humor të jashtëzakonshëm, i cili kishte aftësinë t’i kthente edhe momentet më të zakonshme në të qeshura. Veçanërisht prekës ishte rrëfimi për kontaktin e tyre të fundit. Sipas O’Malley, ata kishin zhvilluar një bisedë telefonike rreth tri javë përpara ndarjes së tij nga jeta. Edhe gjatë asaj telefonate, Anthony kishte arritur ta bënte të qeshte, pa e ditur se ajo do të ishte biseda e tyre e fundit.
Clark nisi rrugëtimin artistik përmes stand-up komedisë, ku fillimisht fitoi vëmendje në skenën e Bostonit. Më vonë, ai u shfaq në serialin “Boston Common”, por kulmin e popullaritetit e arriti me rolin e Greg Warner në “Yes, Dear”.
Në këtë produksion televiziv, aktori interpretoi për gjashtë sezone, nga viti 2000 deri në vitin 2006. Po ashtu, në vitin 2006 mori drejtimin e sezonit të katërt të emisionit “Last Comic Standing”. Pas publikimit të lajmit, mesazhe ngushëllimi dhe homazhe kanë ndarë edhe emra të tjerë të njohur të komedisë, mes tyre Nick Swardson, menaxheri Barry Katz dhe krijuesi i serialit “Yes, Dear”, Greg Garcia. Ndërkohë, sipas medias “Deadline”, vdekja e aktorit dyshohet se lidhet me komplikacione të shkaktuara nga pneumonia. Megjithatë, deri më tani nuk është publikuar një konfirmim zyrtar nga familja lidhur me shkakun e saktë të vdekjes.