Diabeti, sëmundja e heshtur që prek mijëra shqiptarë, mjekët apelojnë për kontrolle në kohë

14 Nëntori shënon Ditën Botërore të Diabetit, një datë që synon të rrisë ndërgjegjësimin për këtë sëmundje dhe rëndësinë e diagnostikimit dhe trajtimit në kohë. Mjekët apelojnë për më shumë sensibilizim, pasi diabeti, i konsideruar si një sëmundje e heshtur, mund të shkaktojë komplikacione serioze nëse nuk mbahet nën kontroll.

Në Shqipëri, rreth 100 mijë të rritur dhe 300 fëmijë janë të diagnostikuar me diabet. Megjithatë, mjekët endokrinologë paralajmërojnë se numri real mund të jetë më i lartë, pasi shumë persona nuk janë ende në dijeni se vuajnë nga kjo sëmundje.

Mungesa e trajtimit mund të pasohet nga komplikacione, të cilat mund të rëndojnë gjendjen shëndetësore ndërsa rreth 4 mijë pacientë trajtohen çdo vit në QSUT për diabetin.

Mjekët bëjnë apel për diagnostikimin e diabetit të tipit 2 që në fazat e hershme, pasi identifikimi në kohë ndihmon në parandalimin e komplikacioneve dhe menaxhimin e sëmundjes.

Ndër faktorët kryesorë që ndikojnë në zhvillimin e diabetit të tipit 2 janë obeziteti, ushqyerja e pashëndetshme dhe jeta sedentare. Për këtë arsye, specialistët theksojnë rëndësinë e kontrolleve periodike, aktivitetit fizik dhe një stili të shëndetshëm jetese.