Jensen Huang, bashkëthemeluesi dhe deri pak ditë më parë drejtuesi ekzekutiv i Nvidia-s, raportohet se ka përjetuar një periudhë të vështirë përpara largimit nga kompania që drejtoi për 33 vjet. Sipas raportimeve, në orët e fundit në detyrë ai shfaqej i lodhur dhe kishte ndryshuar mënyrën e komunikimit me drejtuesit e tjerë.
Duke iu referuar burimeve që kanë dijeni për situatën, Bloomberg raportoi se të mërkurën, gjatë takimeve të fundit në krye të kompanisë, Huang kishte nisur të përdorte shprehje si “çfarëdo” dhe “nuk më intereson”. Sipas të njëjtave burime, ai e kishte përshkruar veten edhe me shprehjen “I’m a piece of s–t”, që në shqip përkthehet “Jam një plehrë”.
Sipas personave që kanë folur me të ditët e fundit, Huang u kishte thënë se shqetësimi i tij kryesor ishte familja dhe se nuk donte të dëmtonte jetën e grave të përfshira në raportimet për marrëdhëniet e tij.
Kriza rreth drejtuesit të Nvidia-s u thellua pas publikimit të pretendimeve për një marrëdhënie jashtëmartesore me Alice Huang, drejtuese e kompanisë Megaspeed International, me seli në Singapor. Ajo nuk ka lidhje familjare me Jensen Huang dhe është përmendur në raportimet mediatike si person që dyshohet nga autoritetet amerikane për lidhje me inteligjencën kineze.
Fillimisht, Huang kishte mohuar se marrëdhënia mes tyre ishte romantike, duke e përshkruar si një raport të zakonshëm biznesi. Por, sipas Bloomberg dhe The Information, ai e pranoi marrëdhënien pasi u përball për këtë çështje nga këshilltari i përgjithshëm i Nvidia-s, Tim Teter.
Më pas, raportimet përfshinë edhe emra të tjerë. “The New York Times” publikoi pretendime për një marrëdhënie mes Huang dhe Kimberly Powell, zëvendëspresidente e Nvidia-s për sektorin e shëndetësisë. Ndërsa Reuters raportoi për një tjetër marrëdhënie të dyshuar me një punonjëse të kompanisë, identiteti i së cilës nuk është bërë publik.
Bordi i Nvidia-s kishte njoftuar më herët nisjen e një hetimi të pavarur për çështjen. Të mërkurën, pas publikimit të raportimeve të reja, drejtuesit e kompanisë zhvilluan një takim urgjent dhe Huang u largua nga detyra. Të enjten, Nvidia konfirmoi dorëheqjen e tij, ndërsa drejtimin e përkohshëm e mori drejtoresha financiare Colette Kress.
Në një mesazh drejtuar punonjësve, Huang kishte pranuar se kishte qenë i pabesë ndaj bashkëshortes dhe kishte kërkuar ndjesë ndaj familjes, aksionerëve dhe partnerëve të biznesit. Ai gjithashtu u shpreh i gatshëm të bashkëpunonte plotësisht me hetimin e bordit.
Largimi i tij shënon fundin e një periudhe 33-vjeçare në krye të kompanisë që bashkëthemeloi dhe e shndërroi në një prej gjigantëve botërorë të teknologjisë dhe inteligjencës artificiale. Huang ishte i përfshirë drejtpërdrejt në vendimmarrjen e përditshme të Nvidia-s dhe kishte rreth 60 drejtues që raportonin drejtpërdrejt tek ai.
Sipas raportimeve, largimi i tij shkaktoi shqetësim te investitorët dhe ndikoi në vlerën e aksioneve të kompanisë, duke fshirë më shumë se 450 miliardë dollarë nga kapitalizimi i saj në bursë.
Ndërkohë, Huang pritet të dëshmojë në një takim me dyer të mbyllura në Kongresin amerikan, ku do të pyetet për marrëdhënien me Alice Huang dhe pretendimet për një operacion të mundshëm të inteligjencës kineze. Çështja ka ngritur shqetësime edhe për sigurinë e teknologjisë së Nvidia-s, megjithëse kompania ka deklaruar se deri tani nuk ka arsye të besojë se sekretet e saj apo siguria kombëtare amerikane janë komprometuar.