“Agasi-Beqiri donin të hidhnin në erë shtetin”

Drejtori i përgjithshëm i MCN TV, Endri Meksi, ka ngritur akuza të forta lidhur me ndërhyrjet në Regjistrin e Gjendjes Civile dhe publikimin e të dhënave sensitive nga grupi i hakerave Homeland Justice. Në një intervistë për emisionin “FactCheck”, ai e lidhi këtë çështje me aktivitetin e Ergys Agasit dhe Ermal Beqirit, duke pretenduar se pas ngjarjeve fshihej një skenar shumë më i gjerë sesa një sulm i zakonshëm kibernetik.

Sipas Meksit, Homeland Justice përbën një pikë kyçe për të kuptuar mënyrën se si janë ekspozuar dhe manipuluar të dhënat shtetërore. Ai pretendon se ndërhyrjet në sistemet publike kishin nisur më herët, por vetëm pas publikimit të materialeve u bë e mundur të kuptohej përmasa e asaj që mund të kishte ndodhur në prapaskenë.

Meksi u ndal edhe te publikimi i komunikimeve elektronike të kryeministrit Edi Rama dhe drejtueses së SHISH, duke ngritur dyshime se këto materiale mund të jenë përdorur si instrument presioni ndaj institucioneve më të larta të shtetit.

“Dikush me një regji nga pas, shantazhonte pushtetin qendror”, deklaroi ai, duke e cilësuar situatën si një shantazh të organizuar për përfitime financiare.

Gjatë intervistës, Meksi përmendi edhe çështjen e pengmarrjes së dy personave, Shima dhe Meçe, duke ngritur pikëpyetje mbi lidhjen e mundshme të kësaj ngjarjeje me përpjekjet për të zhdukur gjurmët e aktivitetit kriminal. Ai theksoi se nuk mund të përcaktohet nëse ky ka qenë qëllimi apo nëse pas ngjarjes fshiheshin motive të tjera.

Duke folur për Ermal Beqirin, Meksi pretendoi se ai kishte ushtruar ndikim të konsiderueshëm në Agjencinë Kombëtare të Shoqërisë së Informacionit (AKSHI). Sipas tij, Beqiri kishte arritur të kishte një rol të jashtëzakonshëm në institucion, ndërsa ngriti pretendime edhe për mënyrën se si shpërndaheshin kontratat publike.

Në këtë kontekst, ai përmendi edhe drejtoreshën e AKSHI-t, Mirlinda Karçanaj, duke pretenduar se kontratat përfundonin në duart e kompanive të lidhura me Beqirin.

Një tjetër shqetësim i ngritur nga Meksi lidhet me pasojat e ndërhyrjeve në Regjistrin e Gjendjes Civile. Sipas tij, cenimi i këtij sistemi nuk prek vetëm identitetin dhe dokumentacionin personal të qytetarëve, por mund të krijojë rreziqe edhe për proceset zgjedhore, duke pasur parasysh rolin që ky regjistër ka në administrimin e tyre.

Ai pretendoi se ndërhyrjet nuk ishin ndalur për shkak të ndikimit që kishte Beqiri dhe se persona të ndryshëm kishin pasur dijeni për situatën, por kishin zgjedhur të heshtnin.

Në deklaratat e tij më të forta, Meksi e cilësoi të gjithë skemën e dyshuar si një përpjekje për të destabilizuar institucionet shqiptare, duke e krahasuar me një skenar që mund të çonte në përsëritjen e trazirave të vitit 1997.

“Skenari i këtyre zotërinjve, Agasi-Beqiri, ishte që të hedhin në erë shtetin, të krijohet një lloj ’97-te e dytë”, u shpreh Meksi.

Ai shtoi se institucionet dhe strukturat e AKSHI-t nuk kishin reaguar në kohë, duke i minimizuar ndërhyrjet si gabime të vogla, ndërkohë që, sipas tij, pasojat mund të kenë qenë shumë më të rënda.

Deklaratat e Meksit rikthejnë në vëmendje pikëpyetjet mbi sigurinë e sistemeve shtetërore, administrimin e të dhënave personale dhe përgjegjësinë institucionale për ndërhyrjet e raportuara në infrastrukturën digjitale të vendit.