“Unë për ty isha Skënderbeu, ti nga Mamica u bëre flamingo”, Rama kërkoi përjashtimin e Spiropalit, por nuk u hodh në votim. Replika e deputetes: Jam kundër atyre që abuzojnë me pushtetin

Debati mes Ramës dhe Spiropalit është shoqëruar edhe me replika të drejtpërdrejta. Kryeministri i është drejtuar asaj me një krahasim historik, duke i thënë: “Unë për ty kam qenë Skënderbeu dhe ti ishe Mamica, por ti i re shtëpisë tënde me gur dhe u bëre flamingo”.

 

Spiropali i është përgjigjur se qëndrimet e saj nuk kanë qenë kundër Edi Ramës, por kundër mënyrës se si, sipas saj, disa persona po përpiqen të shfrytëzojnë Partinë Socialiste. “Unë nuk kam qenë kundër teje, por kundër atyre që abuzojnë me pushtetin dhe shfrytëzojnë Partinë Socialiste. Nëse kjo duket si flamingo, atëherë unë jam një flamingo. Kam qenë kryetare e Kuvendit, nuk ka procedure qe me perjashton”, mësohet të jetë shprehur Spiropali.

 

Kundër përjashtimit janë shprehur edhe figura të tjera të Partisë Socialiste. Fatmir Xhafaj ka kërkuar që ndaj Spiropalit dhe Plarent Ndrecës të merren masa, por jo të shkohet deri te largimi i tyre nga partia. Edhe Pandeli Majko dhe Erion Braçe kanë mbështetur qëndrimin kunder perjashtimeve.

 

Përveç debatit për përjashtimet, një tjetër çështje e rëndësishme në Asamblenë e sotme është riorganizimi i drejtimit politik të Partisë Socialiste në qarqe. Sipas raportimit të gazetarit të Top Channel, Muhamed Veliu, Edi Rama ka vendosur të dyfishojë numrin e drejtuesve politikë, nga 12 në 24, duke ndryshuar kështu skemën e drejtimit elektoral të partisë në prag të zgjedhjeve vendore të 9 majit 2027.

 

Ndryshime parashikohen edhe në qarkun e Tiranës, ku drejtimi politik do t’u besohet Albana Koçiut dhe Ervin Demos. Dy emrat pritet të marrin përgjegjësinë për organizimin dhe koordinimin e strukturave socialiste në kryeqytet, në kuadër të përgatitjeve për zgjedhjet e ardhshme vendore.

 

Asambleja Kombëtare nisi punimet me një fjalë të kryeministrit Edi Rama, i cili kërkoi ndërprerjen e transmetimit për mediat, me argumentin se dëshironte të ndante fillimisht disa mesazhe me anëtarët e forumit. Gjatë kësaj pjese të mbledhjes, komunikimi me të pranishmit brenda sallës ishte i pamundur, pasi telefonat ishin mbajtur të fikur.

 

Në pjesën e hapur për mediat, Rama u ndal te procesi i integrimit europian, duke e cilësuar historik rekomandimin e Komisionit Europian për nisjen në vitin 2027 të përgatitjeve për traktatin e anëtarësimit të Shqipërisë në Bashkimin Europian. Ai kërkoi mobilizimin e strukturave socialiste në të gjithë vendin, në funksion të zgjedhjeve vendore të 9 majit 2027.

 

Kjo është mbledhja e parë e Asamblesë Kombëtare të PS-së pas rreth nëntë muajsh dhe zhvillohet në një moment kur mazhoranca po përgatitet për zgjedhjet vendore, ndërsa përballet me protestat e studenteve dhe partive opozitare ne shesh.

ZHVILLIMET ORË PAS ORE: 

E PLOTË/ “Në 2027 nis përgatitja e traktatit të anëtarësimit në BE”, Rama në Asamble: Protesta u instrumentalizua politikisht, kush ka probleme me drejtësinë, i ka të vetat

A u kërkua përjashtimi i Spiropalit nga PS? Klosi flet pas mbledhjes së Asamblesë: Ajo është anëtare e partisë

“PS nuk bën avokatin e askujt”/ Rama për Ballukun dhe Veliajn: Kush ka probleme me drejtësinë, i ka të vetat. Kemi më shumë të paraburgosur se Rusia

  “E kemi të ndaluar edhe ta mendojmë, jo më ta bëjmë”, Rama i përgjigjet protestës që i kërkon dorëheqjen: Jam krenar për PS, vetëm ne funksionojmë me kronometër

Asambleja me dyer të mbyllura, Top Channel mëson ndryshimet, Rama dublon drejtuesit në qarqe. Ja kush drejton Tiranën

Top Channel