Futbolli në zi, ndërron jetë Agron Memedi, ish-futbollisti dhe pjesëtar i stafit teknik të Shkëndijës
Një lajm i trishtë vjen nga futbolli shqiptar në Maqedoninë e Veriut. Agron Memedi, ish-futbollist dhe anëtar i stafit teknik të Shkëndijës së Tetovës, është ndarë nga jeta.
Lajmi është bërë i ditur nga vetë klubi tetovar, i cili përmes një mesazhi prekës ka shprehur dhimbjen për humbjen e një prej njerëzve të familjes së tij kuqezi.
Memedi kishte qenë pjesë e Shkëndijës fillimisht si futbollist dhe më pas kishte vijuar kontributin e tij në klub si pjesëtar i stafit teknik.
Në njoftimin e tij, klubi ka shprehur ngushëllimet më të sinqerta për familjen Memedi, të afërmit dhe të gjithë ata që e njohën dhe e deshën.
“U prehsh në paqe Goni!”, përfundon mesazhi prekës i Shkëndijës.
Një humbje e dhimbshme për klubin tetovar, ku Agron Memedi do të kujtohet gjithmonë si një pjesë e familjes kuqezi.
REAGIMI I PLOTË NGA SHKËNDIJA
Me dhimbje të thellë njoftojmë ndarjen nga jeta të Agron Memedit, anëtarit të stafit teknik dhe ish-futbollistit të klubit tonë.
Sot, klubi ynë ka humbur një nga njerëzit e tij, një njeri që ishte pjesë e familjes kuqezi, fillimisht si futbollist e më pas si pjesë e stafit teknik.
Në këto momente të rënda, mendimet dhe lutjet tona janë me familjen Memedi, të afërmit dhe të gjithë ata që e njohën dhe e deshën Agronin.
Ai do të mbetet gjithmonë pjesë e familjes sonë.
U prehsh në paqe Goni!
