Ushtria izraelite njoftoi se kishte kryer një sulm ajror ndaj një prej komandantëve të lartë të krahut ushtarak të Hamasit në Rripin e Gazës. Burime nga Hamasi konfirmuan se në këtë sulm u vra Samir Abu Yunis, i cili drejtonte Brigadën Rafah.
Sipas Reuters, që citon burime të organizatës palestineze, Abu Yunis ishte komandant i Brigadës Rafah, pjesë e krahut të armatosur të Hamasit.
Punonjësit mjekësorë konfirmuan vdekjen e tij dhe bënë të ditur se disa persona të tjerë mbetën të plagosur nga sulmi ajror. Goditja shënjestroi një rrugë në zonën Al Mawasi, në Khan Yunis, në jug të Rripit të Gazës.
Armëpushimi i arritur në tetor të vitit 2025 i dha fund operacioneve të mëdha luftarake, por nuk solli ndalimin e plotë të sulmeve izraelite dhe as çarmatimin e Hamasit, raporton Reuters.
Sipas të dhënave të autoriteteve shëndetësore në Gaza, të paktën 1,600 palestinezë janë vrarë që prej hyrjes në fuqi të armëpushimit. Gjatë së njëjtës periudhë, kanë humbur jetën edhe pesë ushtarë izraelitë.