Kombëtarja shqiptare luan sot ndaj Bjellorusisë në ndeshjen e fundit dhe vendimtare të Grupit C1 në UEFA Nations League. Një barazim i mjafton Shqipërisë për të siguruar zyrtarisht ngjitjen në Ligën B, ndërsa përballja zhvillohet në stadiumin “Illovszky Rudolf” të Budapestit.
Para ndeshjes, kompanitë ndërkombëtare të basteve e konsiderojnë Shqipërinë si favorite të qartë për fitore. Sipas kuotave të publikuara, fitorja e Shqipërisë vlerësohet me koeficientin 2.00, që i jep skuadrës rreth 50% shanse për sukses. Barazimi, rezultat që gjithashtu shërben për objektivin e kombëtares shqiptare, kuotohet me 3.38, ndërsa një fitore e Bjellorusisë shihet si më pak e mundshme, me koeficientin 4.40.
Ekspertët e basteve parashikojnë një sfidë të ekuilibruar dhe me kujdes të lartë taktik. Opsioni “Nën 2.5 gola” vlerësohet me kuotën 1.70, çka reflekton pritshmërinë për një ndeshje me pak gola. Sa i përket golashënuesve të mundshëm, sulmuesi Rey Manaj renditet si kandidati kryesor për të gjetur rrugën e rrjetës, i ndjekur nga Cristian Shpendi dhe Arbër Hoxha.
Në renditjen e grupit, Shqipëria kryeson me 12 pikë, dy më shumë se Bjellorusia që ndodhet në vendin e dytë. Në përballjen e parë të grupit, e zhvilluar në Tiranë, kuqezinjtë fituan 2-0, rezultat që i vendos ata në një pozicion favorizues para ndeshjes së sotme. Me këtë tablo, ndeshja në Budapest ka karakter vendimtar për fatin e ngjitjes në Ligën B, ku një barazim do të mjaftonte për shqiptarët, ndërsa Bjellorusia kërkon fitoren për t’u vendosur mbi skuadrën tonë në krye të grupit.