Largimi i Elisa Spiropalit nga forumet drejtuese të Partisë Socialiste nuk është as rasti i parë dhe as një precedent i panjohur. Përtej zhurmës së krijuar rreth vendimit më të fundit të Asamblesë Socialiste, historia e PS-së tregon se përjashtimet, shkarkimet dhe largimet si pasojë e vendimmarrjes politike kanë qenë pjesë e zhvillimeve të brendshme në këtë parti.
Rasti më i bujshëm ka qenë ai i përjashtimit të ish-kryetarit të partisë, Fatos Nano, në vitin 2007, pas votimit të gjashtë deputetëve socialistë pro kandidaturës së Bamir Topit për President të Republikës.
Në mbledhjen e djeshme të Asamblesë, Edi Rama këmbënguli duke iu referuar këtij rasti si shembullit më të rëndësishëm të vendimeve të marra nga partia në funksion të ruajtjes së normave dhe disiplinës së brendshme.
Edhe asokohe, vendimi u mor në mbledhjen e Asamblesë Socialiste, ku në fjalimin e tij, Rama do të deklaronte: “Si socialist s’do të kisha dashur kurrë të shihja ish-kryetarin e partisë sime të rrihte gjoksin si regjisori i shfaqjes së turpshme të shitjes së 6 mandateve të popullit opozitar, për të shpëtuar Sali Berishën nga ballafaqimi me votën e shqiptarëve. Përfitoj nga rasti që të komunikoj për projektin politik të Partisë Socialiste, pjesë e të cilit zoti Nano nuk është më”.
Gjashtë deputetët që ishin pjesë e zgjedhjes së Bamir Topit si President, në kundërshtim me vendimin politik të PS-së, përkatësisht Paulin Sterkaj, Durim Lamaj, Durim Hushi, Bukurosh Stafa, Taulant Dedja dhe Hamit Kosta, u përjashtuan nga Grupi Parlamentar.
Në dhjetor 2011, Kastriot Islami u përjashtua nga Grupi Parlamentar pas mosrespektimit të një vendimi politik. Ishte periudha e përplasjeve me Lëvizjen për Mendim Ndryshe, ku bënin pjesë Ben Blushi, Arben Malaj, Andis Harasani dhe Marko Bello.
Në vitin 2015, Tom Doshi u përjashtua nga Grupi Parlamentar pas përplasjeve publike me drejtimin socialist.
Viti 2016 solli largimin e Ben Blushit dhe Mimoza Hafizit, të cilët themeluan partinë LIBRA. Blushi kishte deklaruar se ishte përjashtuar nga drejtimi i PS-së në Elbasan.
Po atë vit, Koço Kokëdhima u shkarkua nga funksionet drejtuese dhe u largua nga Asambleja Kombëtare e PS-së.
Në vitin 2018, Gjetan Gjetani u përjashtua nga Grupi Parlamentar socialist pas kritikave publike ndaj drejtuesve të Policisë së Shtetit.
Në vitin 2021, Dritan Leli u përball me përjashtimin nga PS-ja pas përplasjeve politike me drejtimin e saj.
Tani radha i ka ardhur Elisa Spiropalit, pas sulmeve të vazhdueshme të saj ndaj qeverisë dhe linjës politike të mazhorancës.
Historia e PS-së nuk fillon me Elisa Spiropalin dhe as vendimet politike të Edi Ramës nuk janë një zhvillim i lindur në nëntor 2026.
Precedentët janë të shumtë, arsyet kanë qenë të ndryshme dhe jo të gjitha vendimet kanë pasur të njëjtën natyrë. Ato mund të diskutohen dhe të kundërshtohen, por nuk mund të paraqiten si një praktikë e panjohur.