Komandanti i Brigadës Rafah, Samir Abu Younis, është vrarë nga një sulm ajror izraelit në jug të Gazës, njoftoi krahu i armatosur i Hamasit.
Sulmi ndodhi të shtunën në Al-Mawasi, pranë Khan Yunis. Ushtria izraelite dhe shërbimi i sigurisë së brendshme Shin Bet njoftuan fillimisht se kishin goditur një oficer të lartë ushtarak të Hamasit, pa bërë të ditur emrin. Më pas, Brigadat Al-Qassam zbuluan identitetin e tij dhe konfirmuan vdekjen.
Të lidhura
None found
Sipas raportimeve të mediave ndërkombëtare, Abu Younis ndodhej në një rrugë të zonës në momentin e sulmit. Nga goditja u plagosën edhe persona të tjerë, të cilët u dërguan për mjekim në Spitalin Nasser në Khan Yunis.
53-vjeçari ishte ndër drejtuesit e lartë të Hamasit. Organizata thotë se ai kishte marrë pjesë në planifikimin dhe mbikëqyrjen e sulmit kundër Izraelit më 7 tetor 2023. Brigadat Al-Qassam e cilësuan si një prej figurave më të rëndësishme të përfshira në atë proces.
Abu Younis e mori drejtimin e Brigadës Rafah pas vdekjes së paraardhësit të tij, Nayel Abu Obeid, në shtator. Ai i ishte bashkuar krahut të armatosur të Hamasit në vitin 1991 dhe, sipas organizatës, kishte mbajtur më pas disa poste të larta operative në zonën e Rafah.
Ushtria izraelite pretendon se ai kishte drejtuar anëtarë të Brigadës Rafah në sulme ndaj civilëve dhe ushtarëve izraelitë. Abu Younis dyshohet gjithashtu se ishte përfshirë në përpjekjet për të rindërtuar aftësitë operacionale të organizatës.
Vrasja e tij ndodh në një kohë kur sulmet izraelite në Rripin e Gazës janë përsëritur, pavarësisht marrëveshjes së armëpushimit që hyri në fuqi në tetor 2025. Të dyja palët akuzojnë njëra-tjetrën për shkeljen e kushteve të marrëveshjes.
