Luiza Gega ‘mbretëron’ në Maratonën e Tiranës! Përshkon 42 kilometra dhe rrëmben çmimin prej 5 mijë eurosh
Atletja shqiptare Luiza Gega është shpallur fituese e Maratonës së Tiranës, duke triumfuar në garën kryesore prej 42 kilometrash. Në edicionin e dhjetë të këtij eventi sportiv, ku morën pjesë rreth 5,800 garues, Gega siguroi edhe çmimin e madh prej 5 mijë eurosh.
Luiza Gega ka triumfuar në edicionin e dhjetë të Maratonës së Tiranës, duke u renditur në krye të garës së plotë prej 42 kilometrash. Atletja shqiptare përshkoi distancën maratonike dhe fitoi çmimin prej 5 mijë eurosh, në një aktivitet që këtë të diel mblodhi rreth 5,800 pjesëmarrës.
Maratona nisi në orën 08:00 dhe përveç garës kryesore, këtë vit solli edhe një risi: garën prej 5 kilometrash, e cila synon të përfshijë më shumë qytetarë dhe t’u japë mundësi edhe atyre që nuk janë atletë profesionistë të bëhen pjesë e aktivitetit.
Organizimi i këtij eventi ka kërkuar gjashtë muaj përgatitje, ndërsa në terren janë angazhuar rreth 600 vullnetarë, 800 punonjës policie dhe 500 punonjës të Bashkisë së Tiranës.
Rrugët e bllokuara deri në orën 16:00
Për shkak të zhvillimit të maratonës, një pjesë e konsiderueshme e rrugëve të kryeqytetit do të qëndrojnë të bllokuara për qarkullimin e automjeteve deri në orën 16:00
Pa qarkullim do të jetë e gjithë Unaza e Vogël e Tiranës, si dhe bulevardi “Zogu i Parë” dhe Bulevardi i Ri. Kufizimet përfshijnë gjithashtu segmentin nga sheshi “Skënderbej” deri te sheshi “Nënë Tereza”, Rrugën e Kavajës, Rrugën e Durrësit, “Myslym Shyri”, rrugët e ish-Bllokut dhe kryqëzimet që lidhin bulevardin me Rrugën e Elbasanit.
Ndërkohë, për shkak të itinerarit të garës, edhe disa linja të transportit publik urban do të devijohen gjatë ditës së diel.
360grade.al
