Fshati Kodër është në juridiksionin administrativ të Bashkisë së Finiqit dhe të njësisë administrative Livadhja. Ndodhet në krahun e majtë të rrugës kombëtare Krane Qafë Botë, 3 kilometra larg saj dhe vetëm 12,5 kilometra larg qytetit të Sarandës.

Ka një lartësi vetëm 290 metra nga niveli i detit dhe ka një klimë optimale për kultivimin e kulturës së ullirit. Gjatë 2-3 dekadave të fundit banorët e Kodrës kanë dyfishuar numrin e rrënjëve të ullirit   duke i çuar në 10 mijë.

Nga 1000 banorë të regjistruar vetëm 100 prej tyre janë me banim të përhershëm në fshat, por emigrantët kthehen për vjeljen e ullirit.

“Fshati ka dy djem që kanë fabrikat e vajit në fshatin e Livadhjas. Prodhimin e tyre e çojnë atje. Prodhimi është i mbarë. Njerëzit marrin prodhimin e parë. Vazhdojnë me këtë punë.“, sqaron një banor i fshatit.

“Ka interes nga emigrantët. Nuk ka familje pa ullinj të mbjella në këto vitet e fundit. Ka ca familje që kanë mbjellë sasi të mëdha. Po janë pak ata. Kurse të tjerë sigurojnë vajin e ullirit për familjen. Prodhimi është i kënaqshëm sivjet. Po është puna kush i mbledh? S’ka kush mbledh.”, thekson banori i fshatit Kodër.

“Vijnë dhe i mbledhin. Po marrim edhe të tjerë që na ndihmojnë. Po tani sivjet marrin më shumë para. Nuk i paguajnë dot fshatarët. E sigurojmë vetë vajin e ullirit.”, thotë një banore e fshatit.

Gjithashtu, banorët e Kodrës kanë mungesa të theksuara në infrastrukturë, si në atë rrugore, si në ujin e pijshëm, ashtu dhe me ndërprerjet e shpeshta të energjisë elektrike.

/rtsh/