Rekord në Ishujt Kanarie, afro 1.500 emigrantë mbërrijnë brenda një dite në Spanjë 15/11 18:04
Skema e ngjyrave
Madhësia e shkrimit
Një ndihmës i kryeministrit britanik, Andy Burnham, është fotografuar duke përdorur ChatGPT për të përmirësuar një fjalim politik, duke shkaktuar polemika në Britaninë e Madhe dhe duke i dhënë opozitës mundësinë të ironizojë qeverinë.
Fotografitë, të publikuara fillimisht nga gazeta “Daily Mail”, tregojnë një prej anëtarëve të ekipit të kryeministrit duke konsultuar inteligjencën artificiale gjatë një udhëtimi me tren nga Londra drejt Holyhead, të premten, më 13 nëntor.
Sipas gazetës britanike, ndihmësi po punonte mbi fjalimin që Burnham do të mbante një ditë më vonë në konferencën e Partisë Laburiste në Uells, në qytetin e Llandudnos. Ai i kërkoi ChatGPT-së ta bënte një pjesë të tekstit “pak më emocionale”, ndërsa po përpunonte mesazhet politike të kryeministrit.
Pjesa në fjalë lidhej me trashëgiminë politike të ish-kryeministres Margaret Thatcher dhe pasojat që mbyllja e minierave, fabrikave dhe industrive të tjera pati në komunitetet britanike gjatë viteve 1980.
Sipas “Daily Mail”, ChatGPT sugjeroi që fjalimi të mos përqendrohej vetëm te humbja e vendeve të punës, por të përfshinte edhe ndikimin social të mbylljes së industrive. Konkretisht, inteligjenca artificiale propozoi referenca për klubet e punëtorëve, ekipet sportive, koret dhe sindikatat, si pjesë e jetës komunitare që u zhduk bashkë me shumë vende pune.
Referenca të ngjashme u përfshinë në fjalimin që Burnham mbajti të shtunën, ku ai kritikoi politikat e viteve 1980, duke thënë se ato kishin shkatërruar mënyrën e jetesës së shumë komuniteteve në Britani. Ai përmendi mbylljen e minierave, fabrikave dhe uzinave të çelikut, si dhe humbjen e strukturave sociale që dikur bashkonin banorët.
Zbulimi nxiti reagime nga opozita. Lee Anderson, nga partia Reform UK, ironizoi përdorimin e inteligjencës artificiale nga ndihmësi i kryeministrit, duke e lidhur këtë episod me mungesën e një plani për përballimin e krizës së kostos së jetesës.
Nga ana tjetër, Downing Street u përpoq të minimizonte rëndësinë e polemikës. Një zëdhënës deklaroi se kryeministri shkruan vetë shumicën e fjalimeve të tij dhe se edhe në këtë rast ndihmësi kishte kërkuar vetëm komente për një tekst që ishte përgatitur më herët.
Sipas raportimeve të mediave britanike, sugjerimet e ChatGPT-së nuk u përfshinë në versionin përfundimtar të fjalimit.
Ngjarja vjen në një moment delikat për Burnham, i cili po përballet me kundërshtime brenda Partisë Laburiste lidhur me ndryshimet e propozuara në sistemin e mirëqenies sociale. Episodi ka hapur gjithashtu debat mbi përdorimin e inteligjencës artificiale në hartimin dhe përpunimin e mesazheve politike.
Top Channel
