“Aromë” lufte? BE godet flotën sekrete rus

Bashkimi Europian ka shtuar presionin ndaj flotës sekrete ruse, duke ndërhyrë në Detin Mesdhe ndaj një cisterne nafte që dyshohet se është pjesë e rrjetit të përdorur nga Moska për të anashkaluar sanksionet ndërkombëtare.

Operacioni u zhvillua më 13 nëntor, kur forcat detare europiane hipën në bordin e anijes MV MIDAG. Lajmi u bë publik nga shefja e politikës së Jashtme të BE-së, Kaja Kallas, e cila konfirmoi se ndërhyrja ishte pjesë e përpjekjeve për të goditur flotën sekrete ruse.

Sipas Kallas, cisterna që transportonte naftë bruto po lundronte nën një flamur të rremë dhe u ndalua në kuadër të Operacionit IRINI. Të dhënat e platformës MarineTraffic tregojnë se anija ishte regjistruar duke lundruar nën flamurin e Zimbabvesë.

Kallas theksoi se Bashkimi Europian do të vazhdojë të veprojë kundër këtij rrjeti, si në det, ashtu edhe përmes kanaleve diplomatike.

Ndërhyrja u mbështet në nenin 110 të Konventës së Kombeve të Bashkuara për të Drejtën e Detit, i cili parashikon mundësinë e inspektimit të anijeve në rrethana të caktuara.

Presioni ndaj Moskës pritet të shtohet edhe në frontin ekonomik. Më 16 nëntor, ministrat e Jashtëm të vendeve anëtare të BE-së pritet të miratojnë lista të reja sanksionesh kundër Rusisë. Masat e propozuara përfshijnë banka, blerës të naftës dhe kompani që dyshohet se mbështesin funksionimin e flotës sekrete.

Ky nuk është rasti i parë i një ndërhyrjeje të tillë në Mesdhe. Në gusht, forcat europiane hipën në një tjetër tanker të dyshuar, MV Sun, për të verifikuar statusin e flamurit me të cilin lundronte.

Flota sekrete është kthyer në një instrument të rëndësishëm për Rusinë, duke i mundësuar Kremlinit të vazhdojë eksportin e naftës dhe të sigurojë të ardhura për financimin e luftës kundër Ukrainës. Deri në maj të vitit 2026, regjistri i qeverisë ukrainase kishte identifikuar 1,404 anije të dyshuara si pjesë e këtij rrjeti.