Ekranet në shkolla shqetësim për prindërit, mbi 150 mjekë paralajmërojnë për pasoja te fëmijët

Sipas një sondazhi të publikuar nga organizata SafeScreens, 47% e prindërve kanë frikë se përdorimi i pajisjeve digjitale në klasa mund të ndikojë negativisht në shikimin dhe qëndrimin fizik të fëmijëve.

Studimi tregon gjithashtu se 36% e prindërve janë të shqetësuar për ndikimin që koha e gjatë para ekraneve mund të ketë në cilësinë e gjumit të fëmijëve.

Shqetësimet vijnë në një kohë kur më shumë se 150 profesionistë të shëndetësisë, përfshirë mjekë të përgjithshëm, pediatër dhe logopedë, i kanë dërguar një letër ministres britanike të Arsimit, Lucy Powell, dhe ministres së Shëndetësisë, Yvette Cooper. Në letër, ata paralajmërojnë për një “krizë” në shëndetin fizik dhe zhvillimor të fëmijëve, të lidhur me përdorimin e teknologjisë në procesin mësimor.

Profesionistët kanë vënë në pikëpyetje mungesën e provave të mjaftueshme mbi sigurinë dhe vlerën edukative të teknologjisë që po përdoret në shkolla. Shqetësime të tjera lidhen edhe me planet për të përfshirë mjetet e mësimdhënies të bazuara në inteligjencën artificiale, duke filluar nga viti i ardhshëm, për deri në 450 mijë fëmijë nga familje me të ardhura të ulëta.

Shkollat në Britaninë e Madhe shpenzojnë rreth 900 milionë paund në vit për teknologjinë arsimore, një shifër që pritet të rritet më tej.

Ndërkohë, Ministria e Arsimit po përgatit udhëzime për kohën që fëmijët mbi pesë vjeç duhet të kalojnë para ekraneve, të cilat pritet të publikohen përpara Krishtlindjeve.

Qeveria britanike ka bërë të ditur se nuk synon të vendosë kufizime të përgjithshme për përdorimin e teknologjisë, duke argumentuar se ajo tashmë është pjesë e jetës së fëmijëve dhe mund të sjellë përfitime në mësim, krijimtari dhe mbështetjen e nxënësve me nevoja të veçanta arsimore.

Paralelisht, ministrat kanë prezantuar edhe masa më të rrepta për përdorimin e telefonave celularë në shkolla. Sipas planeve të reja, nxënësit mund të detyrohen t’i vendosin telefonat në dollapë të posaçëm ose t’ua dorëzojnë mësuesve gjatë orarit mësimor.

Vendimi synon të krijojë klasa pa shpërqendrime, pasi vetëm 16% e nxënësve të shkollave të mesme deklarojnë se rregullat për telefonat zbatohen gjatë gjithë kohës.

Top Channel