Skandali me këngën serbe në Bruksel, reagon Marta Kos : Nuk përfaqëson qëndrimin e BE-së
Interpretimi i një kënge me përmbajtje nacionaliste serbe gjatë një aktiviteti të organizuar në Bruksel, në prag të Forumit të Zgjerimit të Bashkimit Evropian, ka shkaktuar reagime. Përballë polemikave, Komisionerja për Zgjerimin, Marta Kos, ka shprehur keqardhje për përzgjedhjen muzikore dhe është distancuar nga mesazhet që përcjell kjo këngë.
Përmes një reagimi publik, Kos theksoi se muzika e interpretuar nga artistët nuk pasqyron në asnjë mënyrë qëndrimet apo pozicionin zyrtar të Komisionit Evropian.
“Shpreh keqardhje për përzgjedhjen e këngës nga ana e muzikantëve. Kjo këngë në asnjë mënyrë nuk paraqet qëndrimet e Komisionit Evropian”, deklaroi ajo.
Komisionerja shtoi se institucionet evropiane janë të vetëdijshme për vuajtjet dhe sakrificat e njerëzve në këtë pjesë të Evropës, duke nënvizuar rëndësinë e pajtimit dhe të ndërtimit të një të ardhmeje të përbashkët.
Sipas saj, procesi i pajtimit nuk nënkupton fshirjen e së kaluarës apo mohimin e dallimeve historike, por krijimin e një hapësire ku ato nuk shndërrohen në pengesë për të ardhmen.
“Nuk po kërkojmë të harrohen dallimet, por po ndërtojmë një Evropë ku dallimet nuk do të jenë arsye për të penguar të ardhmen”, u shpreh Kos.
Historia e këngës që shkaktoi polemika
Në qendër të debatit është kënga serbe “Sa Kosova zora sviće”, e njohur gjithashtu si “Oj Kosovo, Kosovo”, titulli i së cilës përkthehet “Nga Kosova zbardh agimi”.
Kënga është krijuar në vitin 1989 nga këngëtari dhe kompozitori serb Ljubomir Manasijević, në një periudhë kur nacionalizmi serb po merrte përmasa të mëdha nën udhëheqjen e Sllobodan Millosheviçit.
Sipas rrëfimit të vetë autorit për mediat serbe, frymëzimi për krijimin e saj erdhi gjatë pjesëmarrjes në ceremonitë e organizuara në Manastirin e Graçanicës, në qershor të vitit 1989, me rastin e 600-vjetorit të Betejës së Kosovës.
Teksti i këngës ndërthur referenca historike dhe fetare me pretendime nacionaliste mbi Kosovën. Në vargjet e saj përsëritet mesazhi “Ne damo te Kosovo”, që në shqip përkthehet “Nuk të japim, Kosovë”, ndërsa territori i Kosovës paraqitet si trashëgimi historike e serbëve.
Pikërisht këto përmbajtje e bëjnë këngën të debatueshme, përtej përshkrimit të saj si një krijim patriotik në diskursin serb.
Keni një histori? Denonco anonimisht, identiteti juaj mbrohet.
Denonco



