Dy të rinj nga Komuna e Rahovecit kanë humbur jetën në aksident trafiku në Gjermani. Lajmin për vdekjen e tyre e ka bërë të ditur kryetari i Rahovecit, Smajl Latifi.
“I tronditur thellësisht nga lajmi për vdekjen tragjike në një aksident komunikacioni në Gjermani të dy të rinjve nga komuna e Rahovecit, Leart Morinës nga Sopniqi dhe Berhan Zekës nga Pataqani i Poshtëm. Në emrin tim dhe të Komunës së Rahovecit, bashkëndiejmë me dhimbjen tuaj të madhe. Ju shpreh ngushëllimet më të sinqerta familjeve Morina dhe Zeka, të afërmve dhe miqve të tyre për këtë humbje të rëndë. Learti dhe Berhani pushofshin në paqe!” – ka shkruar Latifi në Facebook.
Aksidenti ndodhi në autostradën B311 në Erbach të dielën, ku erdhi te përplasja frontale mes dy veturave. Në aksident humbën jetën tre persona, raporton “Swr.de”. Fillimisht një 18-vjeçar dhe një 19-vjeçar, që të dy shoferë vdiqën. E më pas në të dielën mbrëma si pasojë e lëndimeve vdiq edhe një 26-vjeçar. Po ashtu raportohet se një 26-vjeçare u lëndua në aksident.
Sipas hetimeve paraprake, dyshohet se drejtuesi 18-vjeçar humbi kontrollin e automjetit gjatë një manovre parakalimi me shpejtësi të lartë. Fillimisht, makina e tij u përplas me disa automjete të tjera dhe më pas u përplas ballazi me një automjet që po vinte nga drejtimi i kundërt.