Operacioni Endrick, Milani gjen formulën për të bindur Real Madridin. Gati 70 milionë Euro për të

Milan duket se po përgatit një lëvizje të bujshme në merkato, duke synuar transferimin e talentit brazilian Endrick nga Real Madrid. Sulmuesi mund të bëhet një nga objektivat kryesorë të kuqezinjve, të cilët, sipas raportimeve, janë të gatshëm të ofrojnë një shumë që arrin deri në 70 milionë euro.
Oferta e përfolur përbëhet nga 60 milionë euro të garantuara dhe 10 milionë euro të tjera në formën e bonuseve, në varësi të objektivave të arritura.
Situata e Endrick në Madrid mbetet e paqartë. Pavarësisht potencialit të madh, braziliani nuk ka arritur të sigurojë një rol të rëndësishëm në skuadër, çka ka shtuar interesimin e klubeve të tjera. Milani e sheh atë si një investim për të ardhmen dhe dëshiron ta bindë Real Madridin me një formulë që do t’i lejonte madrilenëve ta rikthenin lojtarin në të ardhmen për 80 milionë euro.
Një element interesant në këtë histori është edhe Roc Nation Sports, agjencia që përfaqëson interesat e sulmuesit. Lidhjet mes drejtuesve të Milanit dhe kësaj agjencie mund të ndihmojnë në negociata, ndërsa Roma ka shfaqur gjithashtu interes për futbollistin.
Megjithatë, pengesa kryesore duket se është José Mourinho. Sipas raportimeve të Corriere dello Sport, trajneri portugez nuk dëshiron të lejojë largimin e Endrick, as në formë huazimi dhe as me shitje përfundimtare. Ai beson se braziliani do të ketë më shumë mundësi aktivizimi gjatë sezonit dhe se është pjesë e rëndësishme e projektit të tij.
Për momentin, nuk ka marrëveshje zyrtare mes klubeve dhe oferta mbetet në nivel raportimesh mediatike. E ardhmja e Endrick pritet të jetë një nga çështjet interesante të merkatos së janarit.




