Shpëtim Musliu është një nga personat që po hetohen për përfshirje në një plan të dyshuar terrorist, të supozuar me urdhër nga dy shtetas iranianë, ku objektiv ishte një biznesmen izraelit në Greqi, i cili mban një pozicion të lartë në një kompani të industrisë së prodhimit të armëve në Izrael. Musliu, i lindur më 21 dhjetor 1996 dhe banues në Kumanovë, njihet si një prej katër shqiptarëve nga Maqedonia e Veriut që dyshohet se janë rekrutuar për të realizuar atentatin në territorin grek.
Sipas burimeve të hetimit, grupi ishte i udhëhequr nga Edriz Mavaneh dhe përfshinte, në dyshim, edhe dy shtetas iranianë. Njëri prej tyre është identifikuar me emrin Mabanex dhe dyshohet se kishte rol në sigurimin e financimeve për operacionin, me urdhër të shërbimeve iraniane të inteligjencës. Autoritetet greke kanë deklaruar se ky grup ishte mbajtur nën përgjim për rreth një vit, ndërsa dyshimet lidhen me përgatitjen e një atentati kundër biznesmenit izraelit.
Musliu kishte tentuar më parë të hynte në Greqi përmes Turqisë, por ishte kthyer nga autoritetet kufitare në zonën e Evros. Në një përpjekje të dytë për të kaluar kufirin, ai u ndalua pasi shërbimet greke kishin marrë informacion nga homologët në Maqedoninë e Veriut lidhur me aktivitetin e dyshuar të celulës. Pas ndalimit, Musliu u dorëzua te autoritetet e Maqedonisë së Veriut.
Pas dorëzimit të tij, hetimet janë zgjeruar me qëllim identifikimin e personave të tjerë që mund të kenë bashkëpunuar me celulën. Autoritetet po shqyrtojnë edhe kontakte të mundshme brenda qarqeve të komunitetit mysliman në Greqi. Hetuesit synojnë të zbardhin të gjithë rrjetin e dyshuar, mënyrën e financimit të operacionit dhe rolin e secilit prej të përfshirëve në këtë çështje. Top Channel raporton zhvillimet lidhur me hetimet në vazhdim.
