BE propozon 45 miliardë euro kredi për Ukrainën, Von der Leyen: Do ta shlyejë vetëm kur Rusia të paguajë dëmshpërblimet

Dhënien e një kredie të re prej 45 miliardë eurosh për Ukrainën në vitin 2027, me synimin për të mbuluar nevojat buxhetore dhe ushtarake të vendit, e njoftoi sot Presidentja e Komisionit Evropian, Ursula von der Leyen, gjatë një konference për shtyp së bashku me Komisionerin për Ekonominë, Valdis Dombrovskis, dhe Komisionerin për Çështjet e Mbrojtjes, Andrius Kubilius.
Siç bëri të ditur Von der Leyen, nga kredia e re prej 45 miliardë eurosh, 20 miliardë euro do të përdoren për mbështetjen e buxhetit shtetëror të Ukrainës, ndërsa 25 miliardë euro do të shkojnë për nevojat e saj ushtarake.
Sipas vlerësimeve të Komisionit Evropian, hendeku financiar i Ukrainës për vitin 2027 arrin në 70 miliardë euro, ndërsa nevojat financiare për vitin 2026 janë mbuluar tashmë. Me instrumentin e ri financiar prej 45 miliardë eurosh, të propozuar nga Komisioni, Bashkimi Evropian do të mbulojë rreth dy të tretat e nevojave të Ukrainës për vitin e ardhshëm.
Von der Leyen u bëri thirrje partnerëve ndërkombëtarë të Ukrainës që të mbulojnë pjesën e mbetur, pra një të tretën e nevojave financiare të vendit.
Presidentja e Komisionit Evropian sqaroi se Ukraina do të detyrohet ta shlyejë kredinë vetëm pasi Rusia të paguajë dëmshpërblimet për dëmet që i ka shkaktuar vendit.
“Ne besojmë se kjo është mënyra më e mirë për t’i dhënë Ukrainës një pozicion të fortë negociues”, theksoi ajo, duke nënvizuar se financimi evropian do të garantojë funksionimin e shërbimeve bazë publike, si shkollat dhe spitalet, ndërsa njëkohësisht do të forcojë kapacitetet mbrojtëse të vendit.




