Vendosni fjalën kyçe....

Irani sulmon bazën ajrore amerikane në Kuvajt


Ushtria iraniane shënjestroi të martën asetet amerikane, përfshirë objektet e dronëve dhe raketave, në bazën Ali Al Salem në Kuvajt, sipas mediave shtetërore iraniane.

Ushtria e Kuvajtit duket se konfirmoi sulmet, duke njoftuar se sistemet e saj të mbrojtjes ajrore po përballeshin me një seri sulmesh armiqësore me dronë, shkruan Fox.

“Mbrojtja ajrore e Kuvajtit po kundërpërgjigjet aktualisht ndaj sulmeve armiqësore me dronë. Shtabi i Përgjithshëm i Ushtrisë vëren se çdo shpërthim që mund të dëgjohet është rezultat i sistemeve të mbrojtjes ajrore që po interceptojnë sulmet armiqësore. Të gjithë u kërkohet të respektojnë udhëzimet e sigurisë dhe mbrojtjes të lëshuara nga autoritetet përkatëse”, shkroi ushtria në një postim në platformën X.

Sulmet shënojnë herën e parë që Irani sulmon Kuvajtin në më shumë se dy muaj.

Republika Islamike raportohet se shënjestroi gjithashtu një tjetër aleat të SHBA-së në Gjirin Persik të mërkurën, ndërsa Komanda e Përgjithshme e Bahreinit njoftoi se kishte interceptuar disa sulme ajrore iraniane.

Sulmet e Iranit vijnë pak kohë pasi SHBA-ja goditi të martën një objekt raketash të Gardës Revolucionare Islamike (IRGC) në ishullin Keshm të Iranit.

Ky sulm ishte një përgjigje ndaj goditjes që Irani kishte kryer ndaj një instalacioni radar amerikan në bazën Sheikh Isa në Bahrein.

“Më herët gjatë ditës së sotme, avionët luftarakë amerikanë përdorën municione me precizion të lartë për të goditur një objekt lëshimi raketash të Gardës Revolucionare Islamike (IRGC) në ishullin Keshm, në vetëmbrojtje”, i tha një zyrtar amerikan rrjetit Fox News.

“Goditja ishte një përgjigje ndaj agresionit të IRGC-së, që kishte shënjestruar personelin dhe asetet amerikane. Komanda Qendrore e SHBA-së mbetet në gatishmëri të lartë dhe plotësisht e përgatitur për të mbrojtur amerikanët në të gjithë rajonin”, tha zyrtari në një deklaratë.

Përshkallëzimi i Iranit ndodh gjithashtu në një kohë kur udhëheqësit e vendit po përballen me rikthimin e protestave në të gjithë Republikën Islamike.

Të martën, shpërtheu një protestë në qytetin jugor iranian Abdanan, pasi 13 punonjës të një rafinerie nafte humbën jetën në një aksident rrugor, sipas një raportimi të gazetës Washington Post.