Takimi trepalësh mes Donald Trump, Vladimir Putin dhe Xi Jinping në Shenzhen të Kinës shoqërohet me masa të jashtëzakonshme sigurie. Ndonëse tre liderët pritet të shfaqen së bashku me buzëqeshje dhe deklarata bashkëpunimi, asnjëri prej tyre nuk duket i gatshëm të ulë vigjilencën.
Secili ka marrë masa të posaçme për mbrojtjen personale, nga automjetet presidenciale të blinduara dhe pajisjet e sigurisë bërthamore, deri te kufizimet e rrepta që kanë shndërruar Shenzhenin në një qytet të fortifikuar.
Putin, bombardues strategjikë dhe valixhja bërthamore
Presidenti rus Vladimir Putin mbërriti në Kinë i shoqëruar nga një aparat i fuqishëm sigurie. Sipas The New York Times, imazhet satelitore kanë dokumentuar uljen e dy bombarduesve strategjikë rusë Tu-95MS në aeroportin e Da Nangut në Vietnam, në të njëjtën periudhë me udhëtimin e Putinit në Shenzhen. Avionët janë të aftë të transportojnë armë bërthamore, por nuk ka prova se kanë pasur të tilla në bord.
Në aeroportin e Shenzhenit e priste limuzina presidenciale ruse e blinduar, Aurus Senat. Në delegacionin e tij u vu re edhe valixhja Cheget, e lidhur me sistemin rus të komandimit bërthamor.
Vëmendje kanë tërhequr edhe pamjet e veshjes së Putinit, ku është ngritur dyshimi se mund të mbante një jelek antiplumb nën pallto. Ky pretendim nuk është konfirmuar. Megjithatë, sipas një investigimi të The Moscow Times në vitin 2024, presidenti rus kishte përdorur jelekë të tillë gjatë daljeve publike që prej vitit 2023, me rekomandimin e shërbimit të tij të sigurisë.
Trump, mbrojtja amerikane udhëton me Air Force One
Presidenti amerikan Donald Trump mbërriti në Shenzhen me avionin presidencial Air Force One, ndërsa siguria e tij garantohet nga Shërbimi Sekret amerikan.
Një prej elementeve më të njohura të këtij aparati është limuzina presidenciale Cadillac One, e njohur si “Bisha”, e projektuar për të përballuar kërcënime të ndryshme. Automjeti është pjesë e logjistikës së sigurisë së presidentit amerikan edhe gjatë vizitave jashtë vendit.
Ndërkohë, agjentë dhe pajisje të posaçme sigurie janë vendosur edhe pranë hotelit ku qëndron delegacioni amerikan.
Xi Jinping, Shenzheni kthehet në një qytet të fortifikuar
Ndryshe nga dy homologët e tij, presidenti kinez Xi Jinping ka në dispozicion kontrollin e plotë të territorit pritës. Autoritetet kineze kanë vendosur masa të jashtëzakonshme sigurie në të gjithë qytetin për samitin e APEC-ut.
Që prej 7 nëntorit janë vendosur kufizime për fluturimin e dronëve në disa zona të Shenzhenit, të cilat më pas janë zgjeruar në të gjithë qytetin. Ndalimi përfshin edhe balonat, qiftet dhe objektet e tjera fluturuese.
Kontrollet janë shtuar në stacionet e metrosë, ku bagazhet i nënshtrohen verifikimeve më të rrepta. Edhe dërgesat postare dhe pakot që mbërrijnë në qytet kontrollohen me rreze X.
Kufizime janë vendosur gjithashtu për automjetet me targa të qyteteve të tjera. Sipas Reuters, më shumë se 1.5 milionë drejtues automjetesh janë angazhuar të mos përdorin makinat e tyre, në këmbim të incentivave për transportin publik.
Masat përfshijnë edhe kufizime për përdorimin e borive, ndërsa shkollat dhe bizneset kanë përshtatur aktivitetin për të reduktuar lëvizjet në qytet.
Kështu, ndërsa tre fuqitë botërore përgatiten për një takim historik, Shenzheni është kthyer në një fortesë sigurie, ku çdo lëvizje dhe çdo detaj duket se është nën kontroll.










