Ukraina godet për herë të tretë këtë javë urën që lidh Rusinë me Krimenë, ndërpritet qarkullimi hekurudhor

Forcat ukrainase kanë goditur sërish urën që lidh Rusinë me gadishullin e pushtuar të Krimesë, më pak se dy ditë pas një sulmi të mëparshëm që shkaktoi shembjen e një pjese të saj. Ky është sulmi i tretë ndaj kësaj infrastrukture të rëndësishme brenda një jave.
Ministria ukrainase e Mbrojtjes bëri të ditur se raketat kundër anijeve Neptune goditën pjesën hekurudhore të urës së Kerçit, me goditje të regjistruara pranë harkut dhe mbi binarë. Sipas saj, shkalla e dëmeve është ende duke u vlerësuar, ndërsa qarkullimi i trenave është ndërprerë.
“Për Rusinë, kjo urë është një korridor për furnizimin e luftës, përmes të cilit transportohen cisternat me karburant dhe vagonët me municion drejt forcave të saj në jug. Ky korridor është ndërprerë”, thuhet në reagimin e ministrisë ukrainase në rrjetin X.
Të martën, Ukraina kishte sulmuar urën me raketa dhe dronë, duke dëmtuar rëndë dhe ndarë në dy pjesë segmentin rrugor, transmeton Telegrafi.
Ura, e gjatë 19 kilometra dhe që përfshin lidhje rrugore e hekurudhore, ka rëndësi të madhe strategjike dhe simbolike për Moskën, ndërsa për Ukrainën ka qenë objektiv i rëndësishëm gjatë gjithë pushtimit rus.
Sergei Aksyonov, kreu i Krimesë i emëruar nga Moska, njoftoi se qarkullimi hekurudhor do të pezullohej deri pasditen e së enjtes.
“Punonjësit tanë të hekurudhave po bëjnë përpjekje heroike për t'u përballur me pasojat e sulmit armik”, deklaroi Aksyonov.
Ndërkohë, Ministria ruse e Transportit konfirmoi se nga sulmi nuk kishte persona të lënduar, por se qarkullimi i trenave përmes urës ishte pezulluar përkohësisht. Trafiku rrugor ka qenë i pamundur që nga sulmi i së martës, i cili shkatërroi një pjesë të autostradës.
Sulmi i fundit ndodhi vetëm disa orë para takimit historik mes presidentit rus, Vladimir Putin, homologut kinez Xi Jinping dhe presidentit amerikan Donald Trump, në Kinë.
"This train terminates here."On the night of November 19, Ukrainian Neptune missiles struck the railway section of the Crimean Bridge, with hits recorded near the arch and on the tracks. The extent of the damage is still being assessed, but train traffic has stopped.Now a little arithmetic: 19 kilometers of track, 38,000 railroad ties and 228 billion rubles spent on construction. This morning, not a single train crossed.For Russia, the bridge is a conveyor belt for its war, carrying fuel tank cars and ammunition wagons to its forces in the south. That conveyor has broken down. The other route runs overland along the front line, and our drones are waiting for the cargo there.For Ukraine, this means time gained and lives saved. The less that reaches the occupiers, the less hits our warriors.This is the third strike on the bridge this week, and it is a response. Last night alone, Russia launched 98 attack drones and missiles at Ukraine.Last stop. Please vacate Crimea.
— Defense of Ukraine (@DefenceU) November 19, 2026
Ura e Kerçit konsiderohet simbol i pushtetit të Putinit dhe i aneksimit të paligjshëm të Krimesë nga Rusia, ndërsa shërben si një nga rrugët kryesore të furnizimit për forcat ruse në rajon.
Ajo është goditur disa herë që nga ndërtimi. Në tetor të vitit 2022, një kamion i mbushur me eksploziv shpërtheu mbi urë, duke shkaktuar dëme dhe ndërprerje të qarkullimit për disa muaj.
Rusia aneksoi Krimenë në vitin 2014, në një nga zhvillimet që paraprinë luftën mes Kievit dhe separatistëve të mbështetur nga Moska në lindje të Ukrainës. Në vitin 2022, Rusia nisi pushtimin e plotë të vendit.
Ndërkohë, zyrtarët ukrainas njoftuan se forcat e tyre kanë goditur edhe dy rafineri nafte në jug të Rusisë. Shtabi i Përgjithshëm i Ukrainës bëri të ditur se sulmet shënjestruan rezervuarët e magazinimit në rafinerinë Ilsky dhe një njësi përpunimi në rafinerinë Afipsky, të dyja në rajonin Krasnodar.
Sipas autoriteteve ukrainase, dy rafineritë mund të përpunojnë së bashku rreth 95 milionë fuçi naftë në vit dhe furnizojnë me karburant forcat ruse në frontet jugore dhe lindore të Ukrainës. Të dy objektet ishin shënjestruar edhe të dielën në mbrëmje.
Zyrtarët rusë raportuan sulme ndaj dy objekteve industriale në rajon, por nuk dhanë hollësi të mëtejshme.
Ukraina ka shënjestruar vazhdimisht rafineritë ruse, në përpjekje për të dëmtuar sektorin e naftës, i cili përbën një nga shtyllat kryesore të ekonomisë së Rusisë.
Presidenti ukrainas, Volodymyr Zelensky, përgëzoi zhvillimin e armëve vendore dhe efektivitetin e tyre në sulmet ndaj urës së Kerçit.
“Teknologjitë dhe kompanitë tona po zhvillohen shumë mirë”, shkroi ai në rrjetet sociale.
Në anën tjetër, forcat ruse kanë intensifikuar sulmet ndaj infrastrukturës energjetike të Ukrainës para dimrit, me synimin për të dëmtuar furnizimin me energji elektrike dhe për të dobësuar moralin e civilëve.
Sipas Misionit të Kombeve të Bashkuara për Monitorimin e të Drejtave të Njeriut në Ukrainë, sulmet gjatë muajit të kaluar kanë vrarë të paktën 372 civilë ukrainas dhe kanë plagosur 1,981 të tjerë. Numri i viktimave ishte 95 për qind më i lartë se në tetor të vitit 2025.
Agjencia e OKB-së theksoi se këtë vit lufta ka shkaktuar një numër dukshëm më të lartë viktimash civile sesa në vitet e mëparshme. /Telegrafi/




































