Rekord historik: Euro bie për herë të parë nën 90 lekë, këmbehet me vetëm 89.5 lekë

Shkruar nga: V Gashi | Publikuar më: 19.11.2026, 18:22

Monedha europiane ka shënuar një tjetër rënie historike në Shqipëri, duke zbritur për herë të parë nën kufirin e 90 lekëve. Euro ka prekur nivelin e 89.5 lekëve në blerje dhe 91 lekëve në shitje, sipas kuotimeve të publikuara në tregun valutor këtë të enjte, më 19 nëntor.

Kjo është një tjetër goditje për monedhën europiane, e cila prej muajsh po humbet vlerë përballë lekut, ndërsa rënia e saj po prek drejtpërdrejt qytetarët dhe bizneset që kanë të ardhura në euro.

Për të kuptuar përmasat e zhvillimit, vetëm një ditë më parë, më 18 nëntor, kursi zyrtar i euros ishte 90.48 lekë, ndërsa sot Banka e Shqipërisë e ka publikuar atë në nivelin 90.02 lekë. Pra, rënia në tregun valutor është reflektuar edhe në kursin zyrtar, megjithëse këto dy kuotime nuk janë të njëjta.

Dobësimi i euros lidhet kryesisht me raportin mes ofertës dhe kërkesës për valutë. Hyrjet nga turizmi, investimet e huaja dhe remitancat e emigrantëve shtojnë sasinë e euros në qarkullim, ndërsa kërkesa për të nuk ka qenë e mjaftueshme për të mbajtur vlerën e saj.

Rënia e monedhës europiane favorizon importuesit dhe ata që kryejnë pagesa në euro, por dëmton eksportuesit, familjet që marrin të ardhura nga emigrantët dhe qytetarët që kanë kursimet në këtë monedhë.

Për shumë shqiptarë që mbështeten te eurot e dërguara nga familjarët jashtë vendit, çdo rënie e kursit përkthehet në më pak lekë në momentin e konvertimit.

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
JOQ Sondazh
KLIKO PËR TË VOTUAR
Më të Lexuarat
Shkarkoni aplikacionin JOQ ALBANIA në platformat
Më të fundit