Putin, thirrje ukrainasve të bashkohen me Rusinë: Ejani në anën e duhur të historisë, Perëndimi do t’ju nënshtrojë

20 Nëntor 2026 | 15:28

Presidenti rus Vladimir Putin u bëri thirrje ukrainasve të braktisin përplasjen me Moskën dhe të bashkohen me Rusinë, në mënyrë që të gjenden në “anën e duhur të historisë”. Ai pretendoi se Perëndimi nuk është realisht i interesuar për të ardhmen e Ukrainës, por synon ta dobësojë, ta përçajë dhe në fund ta nënshtrojë atë, së bashku me Rusinë.

Në një intervistë, të realizuar me rastin e 80-vjetorit të Patriarkut të Moskës, Kirill, presidenti rus paraqiti interpretimin e tij për luftën në Ukrainë, duke e lidhur atë me historinë e Rusisë, ortodoksinë dhe përpjekjet e fuqive të huaja për të kufizuar ndikimin rus.

Putin pretendoi se, pavarësisht tragjedive që po ndodhin aktualisht, të dy popujt duhet të mendojnë për të ardhmen e fëmijëve të tyre dhe të synojnë ribashkimin në një kuptim më të gjerë, pa qenë kjo domosdoshmërisht e lidhur me krijimin e një shteti të vetëm.

Duke iu drejtuar drejtpërdrejt ukrainasve, presidenti rus i ftoi ata të rishikojnë qëndrimin ndaj Moskës dhe të kërkojnë një të ardhme të përbashkët me Rusinë.

“Do të doja t’u thoja: Ejani në anën tonë, sepse kjo është ana jonë e përbashkët. Ejani, pra, në anën e përbashkët, në anën e duhur të historisë”, deklaroi ai.

Putin këmbënguli se konfliktet e sotme ushtarake nuk duhet të përcaktojnë përfundimisht marrëdhëniet mes dy popujve.

“Dhe për këtë arsye, nëse flasim për ukrainasit, do të doja që ata ta dëgjonin këtë mesazh. Pavarësisht asaj që po ndodh, pavarësisht tragjedive që po zhvillohen sot, ne duhet të mendojmë për të ardhmen, për të ardhmen e fëmijëve tanë”, u shpreh presidenti rus.

Më tej, ai pretendoi se Rusia dhe Ukraina mund të sigurojnë perspektiva më të mira zhvillimi përmes bashkëpunimit mes tyre.

“Duhet të kuptojmë se, nëse duam të jemi të fortë, të rëndësishëm dhe të kemi kushtet e nevojshme për një zhvillim të mirë, atëherë, natyrisht, duhet të jemi së bashku. Në kuptimin që duhet të bashkojmë përpjekjet tona për të arritur objektiva të përbashkëta”, përfundoi Putin.

Home Kryefaqja
Shiko në: YouTube
Lajme të Sugjeruara

Dy persona dyshohet se u punësuan nga inteligjenca ruse për të vrarë reperin ukrainas, Kyivstoner

Dy danezë dyshohet se janë punësuar nga inteligjenca ruse për të vrarë një reper ukrainas para një koncerti të planifikuar në Danimarkë. Policia i arrestoi...
15:21 | 20/11/2026

Fyeu zyrtarin e Pentagonit për sulmet ukrainase ndaj Rusisë, ministri gjerman i Mbrojtjes kërkon falje

Ministri gjerman i Mbrojtjes, Boris Pistorius, kërkoi personalisht falje për cilësimin “budallaqe” që përdori lidhur me kritikat e një zyrtari amerikan ndaj sulmeve ukrainase brenda...
15:19 | 20/11/2026

TikTok prezanton funksionin e ri kundër deepfake-ve, përdoruesit do të njoftohen kur IA përdor imazhin e tyre

TikTok ka prezantuar një funksion të ri të quajtur “Zbulimi i Ngjashmërisë” (Similarity Detection), i cili synon të ndihmojë krijuesit e përmbajtjes dhe figurat publike...
14:41 | 20/11/2026