Princesha e Uellsit, Kate Middleton, rrëfen përvojën e saj pas diagnozës me kancer në dokumentarin “Heal”. Filmi, i njoftuar nga Pallati Kensington, flet për përballjen me sëmundjen dhe rikthimin në jetën e përditshme pas trajtimit. Ai do të transmetohet për herë të parë më 29 nëntor në BBC në Mbretërinë e Bashkuar dhe më pas në Shtetet e Bashkuara, Australi dhe Kanada.
Në dokumentar, Kate merr përsipër sfidën “National Three Peaks”, që përfshin ngjitjen e tri majave më të larta të Skocisë, Anglisë dhe Uellsit brenda 24 orëve. Ajo e ndërmerr këtë sfidë në mbështetje të organizatës bamirëse Royal Marsden Cancer Charity.
Gjatë udhëtimit, princesha bisedon me njerëz që po përballen me kancerin ose që e kanë kaluar sëmundjen. Përmes historive të tyre dhe përvojës së vet, ajo flet për rolin e njerëzve të afërt dhe për rëndësinë e mbështetjes psikologjike e emocionale gjatë trajtimit dhe pas tij.
Dokumentari synon të ndërgjegjësojë publikun për një kujdes ndaj pacientëve me kancer që përfshin si shëndetin fizik, ashtu edhe mirëqenien psikologjike e emocionale. Të gjitha të ardhurat nga shpërndarja e filmit do t’i dhurohen Royal Marsden Cancer Charity.



Komente
Komento